Caru cujìnu


Caru cujìnu miu ca sì a Turinu,
cu tanti ambasci e di pinsera chinu,
luntanu di lu munnu di li nanni
ti sìantu accuttufatu e cu l'affanni.

E ìu ca mi trùavu ccà a Milanu
già sunnu quarant'anni, ormai padanu,
lu cori miu 'nnurì comu lu pani
a furia di purtarlu sempri 'mmani.

Fujìammu d'u paìsi comu pazzi
currìannu assà luntanu comu razzi:
cuntentu d'insignari a li carusi
e ìu a fari cunti strani e astrusi.

Vidisti tanti jùma, Po e Doria,
cu ponti e chiesi chini di la gloria;
e pùa 'na gran Fiàt e l'operai
a l'opra notti e jùarnu, fermi mai.

A mia m'impressiunà 'na chiesa granni
'na turri ca pinnìa e dava affanni,
e lu navìgliu ca firriànnu 'ntunnu
parìva circunnari tuttu lu munnu.

Scurdammu lu paìsi e li sicani
sicuri ca luntanu fussi lu pani;
lassannu a cu ristava peni e pisu
currìammu a conquistari 'u paradisu! 

Doppu tant'anni di manciari biova
capisci ch'era mìagliu Cocilova,
unni lu callu tuttu ti stramazza
e renni cchiù pisanti sensu e vrazza.

E ìu ca di michetti sugnu chinu
vulìssi arriturnari a lu pinninu,
pi jìrimi a circari 'na jittèna
cu tantu pani callu e giurgiulena.

Luntanu di la genti d'u paìsi,
macàri tra li canni e 'anti ddìsi,
ca fussi la Samprìa o l'Arbanìaddu,
la grutta di fra Decu o di Pupìddu,

la vita di sicuru fussi meglia
ca 'mmìazzu a li canali e tanta neglia,
sempri di cursa e cu la testa trita
di tutti li pinsera di la vita,

manciannu 'na brioscia a la matina
ca inchi di granita Luvigina:
parlannu di cacciàti di 'na vota
di li cuniglia e di pirnici a sporta.

Lu sensu finalmenti arripusatu
fumannu ìu la pipa e tu trinciatu,
riscriviri la storia di lu munnu
ca mai si ferma e sempri gira 'ntunnu.