Oramai s’avvicina lu Venniressantu
Lu iuarnu chiù tristi pi ogni cridenti
Di milli e mill’anni occasioni di scantu
Di spranza pirduta pi tutti li genti
Oramai s’avvicina e quasi d’incantu
Riporta di bottu di tutti li menti
Lu iuarnu in cui l’omu scinnutu dill’antu
Fu crucifissu malgradu nnuccenti
Di tannu ogni pua, Gesu Sarbaturi
Spaddruzza leggia di li nostri piccati
Fu ricurdatu ddru iuarnu e a tutt’uri
In Iudea , a Roma e nni li cugni scurdati
Di tannu ogni pua, ddru gestu d’amuri
Pur nni li nuastri mudesti cuntrati
Ritorna impunenti in periodu di ‘hiuri
Ca dignanu ancora li nuastri balati
Du cuarpi assistati di vecchia lupara
Sparati a lu cuazzu vicinu a la villa
Abbisanu tutti ch’è pronta la vara
Ca nun è ura ora d’annacarisilla
Du cuarpi a du tìampi d’orata fanfara
Avvìartinu crozzi tardii a capirla
Ca di la menta a la navi, di la zasa a cucchiara
Currinu ora a carricarisilla
Li vìacchi mischini, ca nun su a travagliari
Ca stanchi hannu l’ossa , la testa e li vrazza
Cuieti ,cuieti si nni vannu a taliari
La festa chiù povira di tutta la razza
Li vìacchi mischini, ca nun sannu chi fari
S’intruscianu saggi e vannu pirtantu a la chiazza
Iddri sannu, pi certu, ca a lu scurari
Lu iuarnu all’orariu di solitu impazza
Li carusi ca pi solitu mangianu lìanti e abbunnanti
Si susinu a cuarpu di lu tavulinu
E cu tuttu ca sunnu a panza vacanti
S’allìastinu e currinu pi lu parrinu
Li carusi ca pi solitu vìastunu ganti
Si vuannu attillari di bon matinu
Ma senza strafari e senza culura sgarcianti
Pi nun fari mala parti a Gesù Bamminu
Li fimmini sconzanu svelti la tavulata
Niura sempri, ma tannu chiù scura
E di tutta la greia oramai abbirsata
S’arridducinu sempri all’urtima ura
Li fimmini penzanu a la passata
(Cu tutta la cursa e la primura)
D’accurdarsi ‘ntra d’iddri picchi a la girata
Riformanu rocchi li pridicatura
Lu chianu diventa un furmicularu
Di genti attillati di tanti maneri
Ma vinci lu seriu , lu scuru e l’azzaru
Li vesti adattati, li cosi sinceri
Lu chianu si inchi di silenziu amaru
Li facci straniati , stunati , su veri
Li lamintatura oramai ‘ncuminciaru
E cantanu ora li primi misteri
La fuddra a mità , già di l’iniziu
Si sparti in dù gruassi vaneddri
Parti accumpagna Gesù a lu suppliziu
Parti so mà cu lu cori a feddri
La fuddra a mità , tra nà parti di viziu
E nà parti trimanti la carni e la peddri
Va avanti ed assisti a tuttu lu straziu
Caminannu apprìassu a li virgineddri
Cu porta la cruna ‘ntrizzata di spini
Misa a lu centru di un piattu d’abbarcu
Cugliuti l’uni di ruvetta li cimi ,
l’antri tra grasti e chiantimi a lu parcu
Cu porta li chiova appuntuti fini
E misi nni lu tabarè a mò d’arcu
Ca nni lu cuarpu lassaru li simi
E nni li mani e nni li pìadi ficiru varcu
......................................................