LI MUARTI


Oji li mùarti tornanu 'nnarrìari
a vìdiri li figli e li muglìari
ca suli li lassàru cu' gran scantu
e granni sofferenza e tantu chiàntu.

Si 'nfilanu 'nsilenziu tra li porti
acchiànanu li scali ni la notti,
attenti a nun svigliàri li carùsi
c'aspettanu li nanni tutti ansiùsi.

E chiddi mischinazzi ca lu sannu
e aspettanu cu 'ansia tuttu l'annu,
nun dùarminu stanotti sì fatata
attenti a lu rumuri e a la pidàta.

Ma sannu ca taliàri è propriu malu
si vùannu ca cci porta lu rigalu:
si vidi ca lu mùartu gira 'ntùnnu,
si gira e si nni va intra un secunnu.

Allùra ni lu lìattu si ni stannu
cu l'ùacchi a paparina pi lu sùannu,
attenti a cuntrullari cu l'affannu:
ma guai taliari s'è lu ziu o lu nannu.

Appena spunta l'alba e 'u gaddu canta
di cursa vannu in cerca pi la stanza,
riscìadinu lu stipu e li casciuna
sicuri di truvari nuci e puma.

E trovanu rigali in abbunnanza
cu tantu di biglìattu e pruviniènza,
ca pari ca pi tutta la nuttata
ci fu ni chidda casa l'adunata

di tutti i mùarti vìacchi o frischi d’ora
magari di cent'anni o cchiù ancora,
ca mancu ti ricùardi l’esistenza,
turnati pi vidìri ‘a discinnenza.

Allura mentri sùani ‘u tammurìnu
e mentri manci ‘u pupu zuccarinu,
dumànni a la to’ mamma si su’ spirdi
c’arrivanu di notti cu li stìddi.

"Sicuru ca un su’ spirdi né fantasmi
ma sunnu in carni e ossa, e veri armi.
Sannò comu putìssiru purtari
tanti rigàli accussì bìaddi e rari?".