CHIANCI
MUNTIDORU
Chianci Muntidoru e grida aiutu,
Cu pocu Civili e malu cuvirnatu,
Cu un sulu Tempiu c'amu avutu
Sempri l'hannu vulutu allavancatu.
Li Pirriatura di lu Statutu
Lu surfaru di sutta ci hannu tratu,
Gesù Cristu si finci surdu e mutu.,
li chiama "lu paisi sfurtunatu".
Di la pirrera di lu Cannataru,
si cumincia a ruzzulari Muntidoru
Di la pirrera di li Signuri Lumia
Detti scossa lu tempiu di Diu.
Di la pirrera di lu Sagramentu
ha trimatu l'altaru d'ogni santu.
Jammu a la chiesa e dicernu - Mi pentu!
Ma Gesù Cristu nun mi duna cuntu.
A li vintinovi ottuvru lu matinu
di lu milli novecentu zeru unu,
mentri dicia la missa lu parrinu
cu poca genti e cu lu sagristanu,
ha trimatu lu damusu e lu quatrinu,
vicinu la porta di lu campanaru,
lu tirruri chi fu di lu Parrinu,
Heja!... così dicia alu sagristanu.
Doppu ca livau di vivirisi lu vinu
si nni nisceru fori a manu a manu,
ci fu un spaventu nni lu cummicinu,
la Chiesa si guardava di luntanu.
|
Nun ci fu cchiu l'ufficio Divinu,
cà Muntidoru addivintà paganu.
Ora di chiesa fa lu magazzinu
pi pinitenza d'ogni cristianu!..:
Chiangiti tutti frusteri e paisani
ommini dotti e fimmini civili,
cadiu la chiesa digna, univirsali.
Bedda, adurnata ca nun avia fini!...
Hannu scinnutu lu lorgiu e li campani
pi fari cuitari li parrini,
amari tutti cu' cci misi mani
trattati comu Turchi Saracini.
Sapiti chi ficiru ammanu ammanu.
Pi chiesa ci addubbaru lu casinu,
scinnieru li campani di lu campanaru
e l'appinniru in mezzu a lu jardinu;
Chista è gravizza di lu sagristanu
pi sunari mezzojornu e matutinu,
Livaru lu parlamentu du luntanu
Ca sunava la missa cu lu tammurinu
Quannu arrivaru a li pedi di l'Artaru
dissiru: hamu truvatu lu trisorol...
Taliati ca trimau lu campanaru,
La Porta Fanza cu tuttu lu muru
(...)
|
Ficiru
stari la chiesa un palummaru
Cà tutti li Santi ristaru a lu muru.
Quannu nisceru lu santu Sagramentu
di Muntidoru s'intisi lu chiantu;
Ci fu nni lu paisi un gran sgumentu;
Chianciva ogni statua di Santu.
(...)
Tutti davanti a Diu l'hammu a pagari,
Gabilloti, Prupriitaria e surfarara,
Ngignera, capumastri e pirriatura
'infina a li carusi ca lu carriaru,
l'Ammaggistratu cu l'Apiritura
E lu Prufeta ca nun sappi fari,
Ora cu' l'arripara sta svintura?
a chistu dannu nun si duvia arrivari.
O Muntidoru, prega di cuntinu
quantu ti levi d'essiri paganu,
(...)
Vo' sapiri cu' fici stu latinu,
lu fici 'n'omu ca mancu va un granu,
di lu so' nomu chiamatu Agustinu
di lu Vituzzi famiglia d'Alfano.
Agostino Alfano
|
