LE POESIE DI NICOLO' FALCI

 

LA FESTA DI LI MUARTI

Sia la Bifana ca Babbu Natali
Cu lu cufinu, purtannu rigali,
Fannu filici ed assà cuntenti
tanti carusi di lu cuntinenti.

E ni la nostra amata Sicilia
la stessa cosa fa Santa Lucia
Ca nun si scorda di li pulintuna
E anchi ad iddri rigala cci duna.

Ma tradizioni di la nostra terra,
sia ni lu chianu com’anch’a la serra,
è sempri chiddra ca a li carusi
li fa arristari in attesa curiusi.

La notti doppu di Tutti li Santi,
li nannariaddri pinsannu a quanti
lassaru ‘n terra cci fannu ‘n rialu
ca pi li cchiù nichi è un veru scialu.

Ma chi si cunta a li picciliddri?
cu nun c’è cchiù ancora pensa ad iddri.
Di nott’e notti chi ti fannu chisti?
trasinu intra senz’essiri visti

e ‘n cert’agnuna ti vann’ammucciari
cosi ca pua s’ann’a ijr’ajhari:
"ossa di muarti", e quarchi pigiama,
ma anchi frutta di marturana.

E quarchi bbota un paru di scarpi
pupi di zuccaru, juachi e sciarpi:
parissi na caccia a lu tesoru
e socchi s’ajha è miagliu di l’oru.

Lu ma curuzzu cuntent’arristava:
ddra genti ‘n cialu a nantri pinzava!
Li ringraziava, allura, priannu,
pi la nannareddra e lu catanannu.

Ma li carusi fann’ora la festa
cu na cucuzza mintiannusi ‘n testa,
cupiannu sempri li cosi prufani
ca fannu filici li miricani.

Quannu studiavu l’antichi romani
sappi c’avianu li Lari e li Mani,
gent’antinata ca li prutiggiva
e li sbinturi luntanu tiniva.

La stessa cosa i piansu ca fannu
ddri nuastri parianti ca ‘n cialu stannu,
a nantri n’abbasta ‘n cori sarbari
lu tantu beni ca sappiru dari.

Chi nicch’e nacchi ni sta ricurrenza
sta cucuzzeddra ca fa cuncurrenza
a na tradizione ca havi millanni
e fa piaciri a picciuli e ranni!?

A cu havi ‘n testa ddra cucuzza gialla
cci dugn’un cunsigliu: - frijuta falla! -,
si comu mascara la vua usari,
aspetta ca veni carnalivari.