LU MISCHINU

Scinni ni lu pirtusu ladiu e scuru
lu mischinu ca cerca pani duru.
Si cala sutta terra a la matina
ni nesci cu la luna quasi china.
'U bottu jietta all'ariu la pirrera
finiscinu pi sempri li pinsera.

E sempri accussì mori lu mischinu
ca pi li figli cerca pani e vinu.

Cummatti ni la fabbrica fitusa,
di fumu e di rumura all'aria chiusa.
Lu fìarru pari suli tant'è giallu
intra ddru furnu ca scoppia di callu.
Si rumpi d'a callara la catina
lu squaglia ddru mischinu comu cira.

E sempri accussì mori lu mischinu
ca pi li figli cerca pani e vinu.




Cu' fa lu muraturi all'aria aperta
lu curi si rallegra e nun suspetta.
Cu picu e pala scava 'nu fissuni
pi fari funnamenta a un palazzuni.
Ma pua ddru muru cedi comu d'incantu
di la muglieri sìanti urla e chiantu.

E sempri accussì mori lu mischinu
ca pi li figli cerca pani e vinu.


Pi nun parlari pùa di lu viddranu
ca travaglia la terra tuttu l'annu.
'Na vota cu lu sceccu avìa ad arari
usava lu zappuni e attrezzi vari.
Ma ora lu progressu voli un tratturi
ca spessu cadi e duna gran duluri.

E sempri accussì mori lu mischinu
ca pi li figli cerca pani e vinu.



Ora ca lu Natali è già a li porti
e pùa pi Capu d'Annu sunnu li botti,
finarmenti s'arriposa ddru mischinu
offrìannu a li so' figli pani e vinu,
guadagnati cu tutti ddri sudura
e d'arripusari si sonna sempri l'ura.


Ca sia un Bon Natali a ddru mischinu
ca pi li figli cerca pani e vinu.


                                                         Federico