"Brecatabrè, brecatabrè",
sunava 'u tammurìnu,
allegru e spinsiratu,
e sempri ben 'ntunatu.
"Cumànnu e cumannamìantu!",
accuminciàva Minicu Lisìna,
quannu pi vìi e viùzzi,
vanniàva tutti i nutizzi.
"Ordini di lu sìnnacu"
quannu lu camannanti,
vulìa fari sapìri,
cu' avìa a campari
e cu' avìa a murìri.
"Sangunazzu callu"
quannu a la virmarìa,
lu vuccìari avìa scannatu,
e lu sangu avìa vuddùtu.
Quannu arrivava lu pisciàru,
e ordini cci dava di vanniàri,
pi ddi pisci fitenti e puzzulenti,
Minicu arrisintutu cci dicìa:
"Nun vannìu, pi tìa!
Sannò, puzza tutta la vìa!".