Parava ni lu miazzu di la chiazza
un trippìadi cu ranni tabilluna
e cu la so’ chitarra ni li grazza
si mintiv’a cantari na canzuna.
E siddru stavavu tanticchi’attenti
sciarri capivavu ca vi cantava:
ca sempr’accuminciavanu pi nenti
e finiva ca doppu si sparava.
Televisioni assà tannu nun c’era
pi su mutivu ni ddri tabilluna
figuri ci mintìa di storia vera
ca pua vi spiegava una ad una.
E mi li vidu a Busacca e Trincali
ca s’ajutavanu cu na bacchetta
pi fari abbidiri comu lu mali
taglia lu beni cu la so’ accetta.
Storii di mafia e storii di corna
di matri strazziati, figli disprati,
pi lu maritu, lu patri, c’un torna,
muart’ammazzatu balati balati.
Ma anchi storii cu belli finali,
di genti persa ca intr’arritorna;
o di na zita c’un velu nuziali
intra na chiesa di jhuri adorna:
lu so amatu un juarnu cci dissi,
"travagli’un n’haju, lu vaj’a circari,
ma siddru Cristu a mia m’assistissi,
lestu i tuarnu e t’a maritari".
Lu cantastorii cuntava cantannu
la gent’attenta ad iddru ascuntava
e la simenza si iva manciannu
mentri la fini curius’aspittava.
E ancora sìant’a Trincal’o Busacca:
