LU CARRUAZZU

(Una specie di macchinina, in legno e ferro,
con tre grossi coscinetti a sfera per ruote!)

 

Comu currìa viloci ddù carrùazzu,
di lu paìsi pi li vìi e la chiazza!
Parìa 'na machina cu tantu di muturi,
fattu cu sensu e certu tantu amùri.

Fabbricatu cu' fìarru da putìa,
da ddù me patri veru granni artista,
ca pi farlu ci misi tanta testa,
cu tanta abilitati e fantasìa.

Lu susìanu da terra ddi tri roti,
accussì granni ca parìanu vutti,
pi mìagliu sciddicari senza affanni,
e curriri 'nta chiazza e a tutti banni.

Davanti si parava un tunnu sterzu,
pi mìagliu manuvrari ddù carrùazzu,
e diri a ddù signuri ca passava:
"Levati 'i 'mmìazzu, lassami annari!".

L'attrezzu era finutu da 'na seggia,
ca mancu ‘u Papa 'nnavi n’antra tali,
cchiù di lu tronu d'un principi riali,
ni lu palazzu e tutta la sò reggia.

Pi curriri, sulu un muturi cci mancava,
sannò, chi minchia di màchina era!
Ma di mutura 'nn’avìa propriu tanti,
cu tutti ddi carusi ca spingìanu avanti!