La Madonna di li grazii                di Muntidoru 'Na bedda figuredda era attaccata intra 'na nicchia di culuri biancu; sutta 'na muntagnedda era 'ncastrata pi ripararla d'ogni trùanu e lampu. La facci avìa bidduzza e surridenti dui ùacchi ca pirciavanu lu cori; e 'ntesta avìa 'n'alùni sì splindenti ca tuttu 'lluminava dintra e fori. La genti ca passava pi dda via pi jìri a Racarmutu o a la Favara, la cruci cu la destra si facìa e 'ncori 'n'orazioni murmuriàva. Ma siddu avìa cchiù tìampu si firmava pi jìri a cuntrullari di vicinu; ddi deci scalunedda pùa acchianava e sempri cci addumava lu luminu. Quasi ti ringraziava dda Signura muvìannu li so' occhiuzzi culurati: dicìannu ca si affanni avìatu ognura li grazii avìanu stati già accurdati. Scinniva li scaluna lìantu, lìantu, fussi viddanu o fussi pirriaturi, iurannu ca dumani suli o vìantu un mazzu avìa a purtari beddi ciùri.