|
IX - Pinocchiu si vinni l'abbeccedariu pi jiri a vìdiri lu teatrinu di li pupi.
Appena finì di nivicari, Pinocchiu cu lu so’ Abbeccedariu nùavu sutta lu vrazzu, pigliò la strata ca purtava versu la scola: e mentri caminava, cu lu so’ ciaravidduzzu fantasticava milli raggiunamenta e milli castìaddi all’ariu, unu cchiù bìaddu di l’àutru. E discurrìannu sulu sulìddu dicìa: - Oj, a la scola, vùagliu subbitu ‘mparari e leggiri: dumani pùa mi ‘mparu a scriviri e doppudumani m’imparu a fari li ‘nnùmmari. Pùa, cu l’abilità ca mi ritrùavu, haiu a guadagnari tanti sordi e cu li primi sordi ca mi ritrùavu ‘nsacchetta, vùagliu subbitu fari ‘na bedda giacca di pannu a lu ma’ patri. Ma chi dicu di pannu? Ci la vùagliu fari d’argentu e d’oru, e cu li buttuna di brillanti. E ddu mischinu si la merita veramenti: pirchì, ‘nsumma, p’accattàrimi li libbra e pi farimi istruiri, arristò 'n manichi di cammisa…. Cu ‘stu friddu! Nun ci sunnu ca li patri capaci di certi sacrifici!… Mentri tuttu accuttufatu dicìa accussì cci parsi di sèntiri a la luntana ‘na musica di friscaletta e di cùarpi di grancassa: pì pì pì zum, zum, zum. Si firmò e si misi ad ascuntari. Ddi sùani vinivanu di lu funnu di ‘na lunghissima via di travìarsu, ca purtava a un paisìaddu fabbricatu ‘ncapu la spiaggia di lu mari. - Ma chi è ‘sta musica? Piccatu ca ju haiu a iri a la scola, sannò… E arristò ddà cuntrariatu. A ogni modu, duvìa pigliari ‘na soluzioni: o a la scola, o a sèntiri li friscaletta. - Oj vaiu a sèntiri li friscaletta, e dumani vaiu a la scola: pi jiri a la scola c’è sempri tìampu, - dissi finarmenti ddu disgraziatu righìannu li spaddi. Dittu fattu, si ‘mpilò ni la strada di travìarsu, e accuminciò a curriri forti. Cchiù curriva e cchiù forti sintiva lu sùanu di li friscaletta e li cùarpi di la grancassa: pì pì pì... zum, zum, zum. All’improvvisu si truvò ‘mmiazzu a ‘na chiazza tutta china di genti, ca s’affuddava ‘ntùarnu a ‘na granni barracca di lignu e di tila tinciuta di milli culura. - Chi è ddu barraccuni? – addumannò Pinocchiu, girannusi a un carusìaddu ca era di ddu paìsi. - Lìaggi lu cartellu, ca c’è scrittu, e pùa lu sa’. - Ju lu liggissi vuluntìari, ma oi comu vidi nun sacciu ancora leggiri. - Bravu vò! Allura ti lu lìaggiu ju. Ha’ a sapiri ca ni ddu cartellu cu littri russi comu lu fùacu c’è scrittu: GRAN TEATRU DI LI PUPI… - Havi assà c’accuminciò la cummedia? - Ora accumincia. - E quantu si spenni pi tràsiri? - Quattru sordi. Pinocchiu, ca era chinu di frevi di curiusità, persi ogni ritegnu, e dissi senza vriugnarisi a ddu carusìaddu, cu ccu parlava: - Mi li putissitu dari quattro sordi finu a dumani? - Iu ti dassi vuluntìari, - cci arrispunnì l’àutru cugliuniànnulu, - ma oj appuntu nu ti li pùazzu dari. - Pi quattru sordi, ti vinnu la ma’ giacchetta, - cci dissi allura lu pupu. - E chi mi nni fazzu di ‘na giacchetta di carta ciuruta? Si cci chiovi ‘ncapu, nun ti la po’ trari di ‘ncùaddu. - Ti vo’ accattari li ma’ scarpi? - Sunnu buani pi addumari lu fùacu. - Quantu mi duni pi lu cappidduzzu? - Chi bìaddu acquistu! Un cappidduzzu di muddica di pani! Po’ succediri ca li surci mi lu vìannu a manciari ‘ntesta! Pinocciu era comu ‘ncapu li spini. Era prontu a fari l’urtima offerta: ma nunn’avìa lu curaggiu; era indecisu, tistìava e suffriva. A la fini dissi: - Mi vo’ dari quattru sordi pi ‘st’abbeccedariu nùavo? - Iu sugnu un carusu, e nunn’accattu nenti da li carusi, - cci arrispunnì lu carusìaddu cu ccu parlava, c’avìa tantu cchiù giudiziu d’iddu. - Pi quattru sordi l’abbeccedariu mi l’accattu ju, - gridò un vinnituri di panni usati, ca s’avìa truvatu presenti a ddi discursa. E lu libru fu vinnutu all’istanti. E pinsari ca ddu mischinu di Geppettu avìa ristatu a la casa, a trimari di friddu in manichi di cammisa, p’accattari l’abbeccedariu a ddu so’ figliu!
|
