Comi ogni ast’ura, Cummari Taniddra la Tappa, s’affacciava a la porta e mentri dava a ‘mmanciari a li gaddrini, cu lu vacili viacchiu chinu di caniglia, tra un: "puru puru", un: "ci ci ci" e u: "‘nzù burdillara ca mi pizzuliji", chiamava li cummari di lu vicinatu ca era l’ura di diri lu Rusariu.

Addrumati li cannili s’accumincià a sfilari la cruna; Cummari Taniddra faciva di "capa vuci": Nu primu misteru dulurusu si cuntempla… ogni tantu si sintivanu suspruna ‘ngusciati, pruviniri di l’agnuni: Avi Maria china di Grazij… attaccava Taniddra, Santa Maria Matri di Diu… rispunnivanu in coru l’antri cummari, tranni Turiddra la longa: era "accuntu so", ogni tantu si scurdava unni era e a vuci ‘ncapu diciva cosi strammati o cantava quarchi sturnellu. Faciva pena, mischineddra, ma tutti, di solitu, la cumpativanu e la cunurtavanu tranni Cummari Nardazza la ‘ngrasciata ca ci scaccaniava ni la facci e l’avia pi "sbriu di vaneddra" e, ogni tantu, ci faciva quarchi scherzu ca, diciva iddra, scaccaniava pi na simana. Stavota nenti, mancu li fuddriji di Turiddra la scutivanu.

Cummari Taniddra era junta a li litanii: Maria Vergini…Ora pro nobis…Maria Santissima du Rusariu…Ora pro nobis… Tra n’Ora pronobis e nantru, si lamintava Narda a vuci bassa: Ah! Chi disgrazia… Ah! Cosa tinta… *,* C’aviti Cummari Nà? Ci spià Gnura Fofiddra, ca era vicinu, Nenti, nenti mi doli un caddrazzu! Rispunniva Narda e cuntinava a lamintarsi e a scotiri la testa: Ah comu aju a ‘ffari!? Carità Divina, aiutatimi vù! Gridà a vuci ‘ncapu senza vulirlu Cummari Narda issi Cuncetta vi vannu ammuddrannu li niarbi? La lingua v’avissi ammuddrari, arrispunni pronta a la zuffa Narda Basta Basta ‘ntirvinni Taniddra chissù si vrigogni avnti alla Beddra Matri? Finiammu lu Rusariu armenu e ‘ntunarunu la canzuna di la Madionna La Matri Santa, l’Arcancilu lu ‘ntisi e di ‘ncelu ci misi lu nomu Gesù.

* Sulu un miraculu, Pippì, sulu un miraculu mi po livari di ‘ssi guai! * concluse Narda; *E un miraculu sia! * gridà Cummari Pippineddra cuntenti * mi vinni ‘ntesta na cosa ca è migliu d’un miraculu; vu lu sapiti ca ‘ccà ni ‘ssi paiseddra nuastri si quarcuno voli mali a na partita o l’ammazza o, peggiu, ci jetta na flama; è suu quistioni di spargiri la vuci a la genti giusta, ammintarsi li fatti e li facciprovi ca ni lu ….. di un piditu la flama diventa virità. Anchi la genti ‘cchiu tistarda, chiddri cu tecchia di dubbiu, alla fini ……… diciannu: * Però, quannu li scorci caminanu voli ‘ddiri ca si li manciaru li favi * * e chi vuliti diri cu chissu, Pippì? * dissi arripuddruta Cummari Narda, già pronta a la zuffa. * Calmativi, calmativi…* arrispusi Pippina * …facitimi spiegari e pua capiti chiddru ca aju ‘ntesta * e accumincià a spiegari quali era lo so intentu. L’intentu era siccomu la tindenza di la genti era chiddra di cridiri a tuttu ciò ca nun riguarda a iddri stessi senza preoccuparsi si è veru o no; nun divintava difficili farci cridiri ca socchi nasciva era figliu di Ramunnu. Certu, però, ca la Beddra Matri la grazia di darci l’assumiglianza di Ramunnu ci l’avia a ‘ffari: pi chissu Pippina l’avia a prigari a ‘rraggia di cori ogni juarnu finu a quannu nun nasciva; pua quannu nasciva s’avia a truvari prisenti pi riceviri la genti ca vinivanu a bidiri lu picciliddru; iddra pronta avia a ‘ffari nutari a li parenti l’assumiglianza di lu picciliddru cu so pà. Ramunnu secunnu s’avia a chiamari s’era masculu o Ramunnina s’era fimmina. Però, li tri tummina di frummiantu c’avia a ‘ddari a la Beddra Matri l’avera a ‘ddari a iddra, comu ricumpenza di accussì ranni benivulenza. * Sissi, sissi cara cummari… * rispusi Narda susprannu * …vi dugnu socchi vuliti, si ‘ssa grazia vu e la Madonna mi cunciditi!* E fu accussi ca Cummari Pippineddra ogni juarnu diciva lu Rusariu a la Madonna e ogni ….. diciva: Avi Maria piena di grazii: fati ca la vuccuzza assumiglia a chiddra di Ramunnu, Patri nostru ca si ni li celi: fati ca la nasca l’avi precisa a chiddra di so pà, Salvi Regina Matri di misericordia: fa ca l’addrievu avi li mani a mazzola comu a Ramunnu…* Stu discursu durà finu a quannu nun nascì lu picciliddru, anzi, la picciliddra: era na fimmineddra. * Maria quantu e beddra! Maria quantu e ‘rranni!… * dissi la mammana mentri la lavava ni lu vacili di fiarru *…Cummari Nà, avvoglia ca ritardà quasi di du misi a nasciri, a mia mi pari perfetta, na picciliddra di novi misi cunchiuti! Sapiti cummari Nà, vi finì comu a li jumenti ca portanu lu puddriddru ni la panza deci-unnici misi! Ora vì chi casi di la natura!? Mai n’avia vistu, ha! Ha! Ha! * ridiva la mammana * e cinni su cosi strani munnu munnu! * A Girgenti, du anni narriari, a na picciotta ca, cuincidenza avia midè lu maritu ‘nguerra, ci nascì un picciliddru niuru niuru; dopu tri misi c’assaricuglì lu maritu e vitti ‘ddru carusu niuru comu la pici e si meraviglià, la muglieri lu carma diciannu ca siccomu nun aviva latti ci lu fici dari di n’argiriana ca stava ‘mpacci d’iddra a c’aviva n’addrieva. Lu maritu, ca nun era na cima, si cummincì e lu dissi a so matri quannu ji a vitti lu niputiaddru niuru. * Se, se… * ci arrispunnì so mà * …A mia midè mi capità na cosa simili, propriu quannu nascisti tu, figliu miu! Iu mancu n’aviva latti e perciò ti detti latti di crapa pi tantu tiampu e pirchissu t’affacciaru li corna! *Ha! Ha! Ha! Concludì la mammana finiannusi di lavari li mani, jnnusiannu sbattiannu la porta. * Chi facci di mula, Cummari Pippì * dissi ancora dulenti Narda ‘ncapu lu liattu * Lassati perdiri, sapiti chi n’aspetta ora? * dissi Pippina * … la parti cchiu tinta ora amma a cumminciri la genti ca s’annuccenti è di Ramunnu; ca ‘cchiu la taliu ‘cchiu sa voglia russa ca avi ni la frunti mi ricorda quarcunu …Mah? Unni la vitti?… *.* A nuddri banni, a nuddri banni la vidistivu, pirchì sa voglia l’avi Ramunnu ni la gargia di lu culu! Capistivu! Vi vinni la ‘ntisa Cummari Pippì * suggerì Nardazza * Già, già * accunsentì Pippina * m’arraccumannu però iu lu ma duviri lu fici priavu notti e juarnu la Madonna, e mi pari ca tecchia di grazia ni la fici, pirchì sta picciliddra veru ci assumiglia a Ramunnu dunni ancora nun lu sacciu ma li simbianzi su d’iddru e chissu nun vi lu scurdati grazzi a ‘mmia, comu vù certu ma ta dari tri tummina di frumiantu! * * Stati tranquilla ca chissu è pinsiaru miu, vù fati lu duviri fina ‘nfunnu ca siantu ca stannu arrivannu genti * l’astutà Narda. Mancu finiaru di parlare ca ‘ntisiru tuppiari, eranu Cummari Taniddra e Nofria ca capiaru ca la bella novità era arrivata. Oh quantu ci parsi beddra la picciliddra, sciaccuatunazza e chiatta ma tecchia scunchiuteddra pi essiri di deci misi e passa. * Mah, la natura c’è cu nasci di setti misi, cu di novi e cu quasi di unnici. Lu Signuruzzu tutti cosi sapi * dissi giudiziusa Narda * e Ramunnu a propositu lu sapi iddru? * spia Nofria. * chi vulissivu diri? * arraggià Narda ca ‘ddruacu ci pinniva. * No vuagliu diri si l’avvisastivu di lu fattu, di la nascita * la carmà Nofria. * E comu potti fari mischineddra * interveni pronta Pippina * avi unnici misi ca nun si avi notizii ne di vivu ne di muartu * . * però unnici misi fa vivu era e comu * arrispunnì Narda arripizzannu la cosa sbummannu a chianciri tantu pi sbariari l’argumentu. * Curaggiu pinsati a cosi belli ca cu Ramunnu ata a fari festi e fistigliuna, quannu veni * la cunsulava Pippina * e pua taliatila, taliatila, si nun è perfetta Ramunnu? La vucca, li mani a mazzola, la nasca, na stampèa e na figura * * veru è. Ma sa voglia ni la frunti di cu la piglià * spià Taniddra * l’avi Cumpari Ramunnu ni la garcia di lu culu * dissi prontamente Cummari Pippina * accussi ‘ncumpidenza siti cu Ramunniaddru? Comu ci la vidistivu? * addumanna scannaliata Nofria * gran pezza di malusa lu ‘ntisi diri a Cummari Narda, * rispunni risintuta e arridiannu Pippina e arridiaru tutti. Accussi ficiru cu tutti li cristiani ca vinniru a vidiri la picciliddra. E pi ‘nnu lassu di tiampu tuuttu filò lisciu comu l’uagliu, nuddru appi cchiu dubbiu ca Serafina era figlia di Ramunnu. Chissu grazzi piddiveru a Pippina ca era ritinuta na bona e cuscinziusa cristiana. Purtroppo è n’amara rialtà anchi ni ‘ssi tiampi nuastri! Nun è forsi veru ca basta ca na cosa e tinta vanniata tinta è criduta? O se è bona vanniata è bona criduta? E nu è forsi ‘cchiu meglia criduta, la cosa vanniata, quantu è ‘cchiu fidatu, ritinutu capaci, spertu, dottu, puliticu, parenti, cuscinu o cugatu, lu vanniaturi? Riflittiti, cari liggitura, riflitti sempri, quannu unu di chissi vi voli fari cridiri ca anchi lu sceccu vola. Accussi Pippineddra arriniscì ni lu so intentu, perciò vuliva riscotiri chiddru ca ci attuccava; ma Cummari Narda si faciva surda e rimmanava sempri. Almenu ci aviva jutu na triina di voti prima di la citazioni; l’urtima vota, addirittura, Narda ci arrispunnì * Ancora cu sa storia? Vi dissi ca quannu l’aju, li tri tummina di frumiantu vi li dugnu! E ora basta, fori di casa mia e nun arricuglitivi ‘cchiu se no vi cacciu a sputazzati * a sti paroli Pippina arraggià e si sbarrà la panza: * Ah! Pezza di burdillara, dannata e senza ritegnu ca s’avivavu tecchia di rissura nun facivavu chiddru ca facistivu! Dopu tuttu chiddru ca aju fattu pi vù? E ora mi vuliti nigari lu ma dirittu? * * nossigura… * arripunnì risurbuta Nardazza * … lu vostru dirittu vi lu dugnu ora stessu, tiniti ‘cca … "drittu" ‘ncapu li corna * niscì un taccariaddru luangu quantu un juarnu e ci lu sbatti furiusa ntesta e spaddri spaddri .vabbastanu, o ni vuliti nantra tummiata ?* accussi diciannu ci sbatti la porta ni la mascara e nun si fici chiu ncuitari .Di druacu cummari Pippina capi’ ca cummari Narda nun aviva vistu na spica di frummiantu in vita so’;ma la so’ collera e lu so’ duluri eranu tanti ca ,sutta cunsigliu di lu figliu ranni,Ruardu,dicisi di irla a citari drittu ni lu Potesta’,Don Pasquali Scazzetta.